Кыргызстандын ИИМдин ЖКККББнын өкүлдөрү Москвада өткөн илимий-практикалык конференцияга катышты.

Өткөн жумада, Москва шаарындагы Россиянын ИИМдин жол кыймылынын коопсуздугу илимий борборунун 50 жылдыгына арналган илимий-практикалык конференция болуп өттү.

Ага  Кыргыз Республикасынын, Азербайжандын, Армениянын, Беларустун, Тажикстандын, Өзбекстандын  150дөн ашык  жол кыймылынын коопсуздугун камсыздаган кызматкерлери, дүйнөлүк саламаттыкты сактоо уюмунун, аткаруу бийлигинин федералдык органдарынын, билим берүү, илимий жана коомдук уюмдардын өкүлдөрүнөн турган делегаттар катышты.

Эксперттер эксперттик аудиторияга илимий иштеп чыгууларды сунуштап, практикалык тажрыйба менен бөлүшүп, 2036-жылга чейинки 2030-жылга чейин бул жааттагы мамлекеттер аралык саясаттын негизги багыттарын талкуулашты. Балдардын жолдо жүрүү коопсуздугуна өзгөчө көңүл бурулду.

Ошондой эле, ИИМдин Жол кыймылынын коопсуздугун камсыздоо башкы башкармалыгынын делегациялары жана өкүлдөрү Россия федерациясынын ИИМдин Жол кыймылынын коопсуздугун камсыздоо илимий борборуна барышты.

Тажрыйба алмашуунун алкагында борбордун алдыңкы адистери чет элдик конокторду өз бөлүмүнүн ишмердүүлүгүнүн негизги багыттары менен тааныштырып, жолдордо коопсуздукту камсыз кылуу жаатындагы алдыңкы жетишкендиктер менен бөлүшүп, жол кыймылын көзөмөлдөө жана укук бузууларды аныктоо үчүн колдонулган заманбап техникалык каражаттарды көрсөтүштү.

Андан соң делегация Россиянын ИИМдин Мамлекеттик автоинспекциясынын жана Москва Өкмөтүнүн жол кыймылын уюштуруу борборунун иши менен таанышты. Ошондой эле, алар Мамлекеттик автоинспекция музейине барып, Россиядагы жол полициясынын тарыхы жана өнүгүшү жөнүндө билишти.

ИИМдин басма сөз кызматы.